तैसेंचि गोसावी अळजपुरासि बीजें केलें : अळजपुरी पींगळवहीरवीं’ अवस्थान जालें : ‘गोसावीयांसि मी बरवी पुजा न करींचि :’ ऐसें भांडारेकारांचां पोटी उरलेंचि होतें : भांडारेकार तो अप्रतोखू भावीतचि असति : ‘जें माझें काहीं गोसावियांचां ठाई प्रवेसन नव्हेचि :’ गोसावी जाणौनि भांडारेकारांची वास पाहूनि म्हणीतलें : “भटो: तुम्हां करणीए एक असे :” भांडारेकारी म्हणीतले : “तें तरि गोसावी जाणति असति की :” सर्वज्ञ म्हणीतलें : “तूं उभा ठाकलासि चि पुरे: तें एथौनिचि तुमचें सीधी नेइजैल की :” :
मां एक दी गोसावीं नीर्वाणे बीजें केलें : चौकी गोसावी उभे जाले : भांडारेकारातें सर्वज्ञ म्हणीतले : “भटो : तुम्हीं ए देउळी बैसा’ : हे पैला देउळां जाइल :” नीगतां सर्वतें म्हणीतले : “कव्हणी काही म्हणेल तें कीजे हो : भटो:” ऐसें म्हणौनि गोसावीं नीर्वाणे
मागिला बहीरवांचेया देउळा बीज केलें : ते नीर्वाणसि बैसले : धानाबाइ ते पांचौळीची राणी : तीएसि नीर्वाणेची भगति : ते नीर्वाणेसि दांडीए बैसोनि आली : ते भीतरि देउळाआंतु गेली : नीर्वाणेसि पुजा केली : काही ब्राम्हणा दीधलें : मग बाहीरि नीगाली : तवं चौकी भांडारेकारातें बैसलेयां देखिलें : तेयांसि न्मस्कारू केला : मग म्हणीतलें : आमचेया आवारासि बीजें करावें :” “हो कां :” म्हणौनि नीगाले: आपुलेया आवारा घेउनि गेली : तीयां तेयांसि पटिसाळे आसन घातलें : तेथ ते बैसले : मग तीयां ताट भरूनि पुजाद्रव्ये आणिली : बरवीं पुजा करूं आदरिलीं : तीही पुसिलें : “हे काइ?” तीयां म्हणीतलें : “ना हे तुम्हांसि पूजा करूनि :” भांडारेकारी म्हणीतलें : “हे पुजा आम्हांसि काइसी? हे पुजा आमचेयां गोसावीयांसि की :” धानाबाइया म्हणीतलें : ऐसें : तुम्हांहीं आणीक एक गोसावी असति ?” भांडारेकारी म्हणीतलें : “तरि काइ : आम्हांसि गोसावी असति :” धानाबाइया म्हणीतलें : “ते कवणी ठाइं असति ? सांघा : मां आम्हीं तेयांतें बोलाउनि :” भांडारेकारें म्हणीतलें : “ते तुमचेया बोलावीलेयां नैएति : तेयांतें आम्हींचि बोलाउनि :” इतुकेनि भांडारेकार बोलवावेया गेले : मग गोसावीयांपुढे सांघीतलें : गोसावीयांतें वीनवीलें : गोसावीं वीनवणी स्वीकरिली : मां गोसावी तेथ बीजें केलें : गोसावीयांतें बोलाउनि घेउनि आले : धानाबाइया गोसावीयांतें देखिलें : मग बरवें आसन केलें : गोसावी आसनी उपवीष्ट जाले : मग धानाबाइया गोसावीयांलागि : तेयाहीहुनि उंचें बरवीं पुजाद्रव्ये आणिली : ताट भरूनि गोसावीयांसि पुजा करूं आदरिली : सर्वज्ञ म्हणीतलें : “बाइ : हे यांचे की : हे यांचां हातीं देया : मां हे एथ पुजा करिती : मां एथौनि एथ स्वीकरिजैल :” “हो कां जी : म्हणौनि तेही भांडारेकारांचां हातीं दीधली : मग तीएं देति भांडारेकारांचां हाती : आणि म्हणति : “हा पदार्थं अमुकीए अवएवीं वोळगवा : हा अमुकीए अवेवी ओळगवा :” मग भांडारेकार ते ते पदार्थ तीए तीए अवेवी ओळगविती : ऐसी भांडारेकारी गोसावीयांसि बरवी पुजा केली : मग तेयांलागौनि ताटभरूनि पुजाद्रव्ये आणिली : तेहीं म्हणीतलें : “हे काइ कराल?” धानाइबाइया म्हणीतलें : “हे तुम्हांसि पुजा करूनि : भांडारेकारी म्हणीतलें : “हे तवं आमचा हाती देया : मां आपुली होती गोसावीयांसि पुजा करूनि :” “हो कां :” म्हणौनि तेही तेयांहातीं दीधली : मां भांडारेकारी गोसावीयांसि पुजा केली : ऐसीया दोन्ही पुजा गोसावीयांचां ठाई केलीया : मां भांडारेकारां थोरू परीतोखू जाला : मां आवघे अळंकार गोसावींचि फेडवीले : तेयांसि माघुतें धानाइबाइसि देओं आदरिलें : तीही नीराकारिलें : “हे काइजी : इस्वरी वाइलें तें मागौतें कैसे घेइजे?’ सर्वज्ञ म्हणीतलें : “बाइ : तुम्हीं वाइलें यांसि : एथौनि एथ स्वीकरिलें : आतां एथौनि तुम्हांसि देइजत असिजे :” “ना जी : हे चंडीस :” सर्वतें म्हणीतलें : “हें जेया रायाचां “
भांडारी असे तेयांचे भांडार थोर होए :” सर्वज्ञ म्हणीतलें : “एथिचें होतें घेया :” म्हणौनि दीधलें : मग तेही घेतले २ : तेणें नीर्वाणेचेया देउळा चुना पीटिला : पौळि केली : तीएं अस्तीकें : उदेसिलें द्रव्य भांडारी न घलीतीचि : मग गोसावी तेथौनि बीजें केलें : भांडारेकारांचेया खांदावरि श्रीकरू घालुनि सर्वतें म्हणीतलें : “भटो : एथौनि तुमचें करणीए चरीतार्थ हो :
